傳奇餐廳ElBulli一位難求，有錢有面都唔輕易享受到神級廚師阿德里亞（FerranAdria）手藝，因為廚神上周末炮製「最後晚餐」後暫別廚房，日後會到哈佛大學開班授徒，更會創辦烹飪學院，將分子美食精髓發揚光大，想再品嚐廚神美食，八方知道，今個月仲有一個機會。

原來廚神收工後出巡多處地方，兩個星期後到北京，8月23日會出席北京飯店萊佛士間法國餐廳Jaan嘅豪門夜宴；公關話廚神會一顯身手，肯定係夜宴高潮。呢個「饕餮晚宴」每位888元人仔，包香檳一杯；兩晚商務客房連早餐嘅「套餐」價，雙人都係人仔4,288元，聽落真係抵到難以置信。
八方向酒店查詢，佢哋話Jaan約有60幾個位，「饕餮晚宴」家已book咗超過三分二，餘下十零廿個位左右，如果反應熱烈，或會考慮酌量加位；至於當晚菜單暫未能提供，要等廚神發辦喎。能夠請廚神到北京為人民服務，其中一個原因係西班牙旅遊局發功，請西班牙名廚在今個月23日至26日獻技，盛會由「饕餮晚宴」揭開序幕，其他日子由另一名廚ChefDaniGarcia包辦。

ChefGarcia來自MarbellarestaurantCalima，係米芝蓮二星食肆，撚手招牌菜包括田園沙律伴泡沫橄欖油、海螺（canaillas）、雙層酥香比目魚伴慢烤番茄，同埋熱情果蛋黃布丁（tocinodecielo）等。ChefGarcia拿手菜係海鮮，據講名菜鱸魚串就係佢對細個時去馬貝拉（Marbella）海灘燒烤嘅回憶，味道簡樸，保留天然風味。
西班牙飲食文化深厚，ChefGarcia擅長將傳統菜式提升到新口味層次，多次將西班牙經典炸魚美食frituras做烹飪實驗創作，令人津津樂道。

mailto:[email protected]