荷李活動作片巨星阿諾舒華辛力加（Arnold Schwarzenegger）出名大隻，更當選過「環球健美先生」（Mr Universe），最近佢於美國著名網上論壇Reddit出現，更真名上網留低溫暖留言鼓勵粉絲，成為熱話。

自稱係阿諾粉絲、住喺加拿大嘅Ali，佢指自己心情唔好已經三個月：「我已經情緒低落幾個月了，呢段期間都無去健身。舒華辛力加先生，可以拜託你，叫我提起我嘅懶惰，然後滾去健身室嗎？我保證咁可以鞭策到我即刻出門口。」

點知真係招來阿諾用真名留言：「我唔會對你咁嚴厲，請你都唔好將自己逼太緊。我哋都會經歷挑戰，都會經歷失敗，有時人生就係一種鍛鍊，重點係你要真係起身做。一啲一啲慢慢嚟啦，先起身落床，做啲掌上壓，或者散下步，做咩都好。一次踏前一步，希望你會感覺好啲，然後返到健身室。」

呢段對話截圖於Reddit大受歡迎，獲7萬個以上嘅讚好，仲引發網友紛紛道出自己嘅心路歷程，果然阿諾舒華辛力加係鐵漢柔情。

精選娛聞，喺晒《娛果》
http://fb.com/appledailyent