林保怡上周日喺香港舉行嘅第24屆華鼎獎中國百強電視劇頒獎禮上，佢跟郭少芸同時得咗觀眾最喜愛影視明星，而今日佢又飛到上海出席2018年絲路凝聚力盛典，聽講今晚佢又有獎攞。原本攞獎係開心嘅事，但唔知為乜，今朝佢突然喺微發文要追朋友債，佢留言：「我一片好心，數額也不少，是時候還我錢了。哈哈...BH。」佢仲放咗一張圖片，上面寫住：「借錢時見人心，還錢時見人品了。借錢是一種信任，還錢是一種責任。」

其實林保怡兩年前就曾發文追債，佢喺微博留言：「欠錢的，已經2016年了，當天因為你有困難借了，我一片好心，數額也不少，是時候還錢了！」《蘋果》記者問保怡追到債未，欠債者係咪圈中人？借咗幾多錢？佢話：「都是朋友，由幾萬到十幾萬，我以後也不做好人，都幾年了，我已經死心了，只不過發個訊息洩洩氣而已，其實也不用太認真，這樣會影響我領獎心情，謝謝你關心。」

精選娛聞，喺晒《娛果》
http://fb.com/appledailyent