上次日馬蔣嘉琦騎「歡樂一生」差啲墮馬，慶幸最終有驚無險。事後檢討，「歡樂一生」冇意外肯定入三甲，買咗嘅馬迷只可以話唔好彩，但係阿妹喺內欄唔多夠位嘅情況下，重夾硬撬位衝，可見佢鬥志真係加零一，對投注咗「歡樂一生」嘅馬迷有晒交代。而喺嚴重失平衡嘅情況下，可以及時反應不致跌馬，亦顯示佢狀態非常弗。

唔經唔覺，阿妹今季已經贏咗16場馬，加埋上季37Win，再贏多17場就贏夠70場頭馬正式畢業，晉升大師傅。現時仲有成半季賽期，阿妹只要平均每兩個賽日贏一場，都可以趕及煞科前達標。若阿妹發揮正常水平，要喺今季內升格應冇問題，相信好多馬迷都會幫阿妹打氣，話唔定睇阿妹畢業，會係煞科前一個小高潮。

阿妹的確好受歡迎，有好多馬迷都會真金白銀追捧佢，座騎都會有飛甚至偏熱。不過，阿妹始終係牌仔，好多馬嘅發揮又確係有瑕疵，有時留放欠缺分寸，鬥末段亦時有亂晒章法嘅情況，始終輸蝕騎功同經驗。好難搵個牌仔同大師傅相提並論，牌仔發揮預咗打折扣，難得阿妹有鬥志又肯拼，值得多多鼓勵。

當然，阿妹亦應該努力改善自己嘅弱點，自己同陣上其他人馬嘅安全，當然唔可以掉以輕心，「歡樂一生」呢場就係一個好好嘅經驗。另外，阿妹亦要警惕避免犯規，經常被罰停賽，冇機會上陣自然冇馬贏。

阿Joe