於今年3月成立的香港演藝界內地發展協進會（下稱為內協會）一眾代表，今日約見行政長官林鄭月娥，於政府總部會面，向特首提出發展方案及建議。出席會議藝人包括內協會會長成龍、執行會長曾志偉、副會長汪明荃、秘書長王祖藍、創會成員古天樂、劉偉強、莫華倫、王英豪、吳傑莊及張劍。

內協會向特首提出於內地長遠發展及建設性的方案，拓展創新創意產業，並配合內地政策，提出訴求，加強業界的發展力度特別大灣區的政策方向。

曾志偉及王祖藍代表會見傳媒，曾志偉說：「內協會於3月成立，特首表示支持，今次會面係回顧半年嘅發展，同埋向特首匯報進展，有關大灣區演藝人發展，同埋新稅收問題，希望多了解後，向藝人解釋種種發展，匯報俾業內人士聽。」

問到藝人於內地發展有否遇到困難，曾志偉表示：「還好沒有太大困難，因為北京同橫店都有辦事處協助藝人，希望增加啲，幫藝人同唔同政府機構連結，我哋做中間橋樑。」

今日向政府提出有關場地訴求，及演藝界心聲，志偉說：「無論喺內地及香港發展，都要政府幫手，今日就向政府提交咗報告，政府則要求我哋落實提交詳細報告，所以每個項目，包括導演會、演藝人協會等，都要各自再寫份詳細報告再遞交。」

志偉話：「好開心政府支持我哋，收到晒我哋嘅聲音最重要。」對於特首會否定期再與內協會會面，志偉話：「特首話『需要就搵我』，知佢好忙，今日都開好多個會，今日有好多局長喺度幫我哋分析，唔同層面有唔同嘅局長去分析，我哋好滿意。」

被問到演藝界出現斷層，如何幫助新人，志偉話：「今日就係向政府提出呢一點，向特首表達，業界o依家有大型製作，有小型製作，就係缺乏咗中層，需要開多啲中產製作。」

王祖藍表示今日遞交咗建議書，內容稍後會公佈。

精選娛聞，喺晒《娛果》
http://fb.com/appledailyent