求驗客手記:墨西哥教頭 冇品衰多腳 - 求驗客
記得細個喺學校踢波,每次推個波到白界線邊都心寒,因為周不時俾場邊圍觀嘅頑皮同學「抽水」,推推撞撞,甚至伸隻腳kick吓你。勢估唔到,墨西哥教練艾古爾都會做出呢啲咁幼稚嘅行為,前日喺美洲金盃對巴拿馬時失驚無神喺場邊出隻陰濕腳,幾乎踢中對方球員列卡度菲臘斯,觸發衝突後齊齊被逐,呢啲都算係冇品中嘅極品。
查實呢場金盃C組賽戰況平凡,墨西哥由米基爾沙巴早段先開紀錄,但冇耐就被巴拉斯佩雷斯扳平,之後嘅事,基本上都同踢波脫鈎;先有墨西哥中場路爾斯洛列加、巴拿馬守將阿曼度根完半場前動粗雙雙被逐,而戲肉就喺完場前10分鐘至發生。當時貌似約基嘅列卡度菲臘斯喺場邊追波,說時遲那時快,任佢點防範都估唔到喺場邊提場嘅墨西哥教練艾古爾,竟然喺呢個時候伸出隻腳,為一場天殘腳vs如來神掌揭開序幕……
驟眼睇,艾古爾呢記天殘腳應該落空,但位置咁敏感,佛都有火,列卡度菲臘斯即時整招佛光初現艾古爾嘆吓,令對方退後幾步。艾古爾身邊嘅助教加入戰圈,齊齊推撞列卡度菲臘斯。事後,兩個「武林高手」領紅牌被逐。
我求大俠搵列卡度菲臘斯嘅資料時搵到張相,發現喺兩年前同一賽事,佢被墨軍球員出腳踢中膝頭,應該幾傷。到底呢位喺巴拿馬國內搵食嘅球員係咪被針對,抑或咁啱得咁蹺中招?我唔知,只知墨軍呢場波以熱門姿態和1:1已經夠醜(累熱W客更加唔在講),艾古爾冇品就醜上加醜。另外,場內夠激,雙方球迷喺場外亦不斷衝突,呢一腳一掌更加引發球迷打鬥,為咩呢?