離巢大台嘅胡杏兒，上年同有「港姐殺手」稱嘅金融才俊李乘德(Phil)熱戀中，現年35歲嘅杏兒踏入適婚年齡，一直表明恨嫁，早前已傳佢同男友有共識，計劃年底拉埋天窗，不過，杏兒現時轉攻內地市場，拍緊《領養》，冇時間做跟得女友，男友更被爆只係佔夜場Play嘅二十分之一嘅股份，亦唔係公司董事，更冇物業喺手，早前仲搬咗去杏兒嘅單位同居(新聞連結： http://bit.ly/1T7Y1UX )。

今日有周刊更爆，Phil趁杏兒北上拍劇，佢仲鎅32C翻版「栢芝」CrzTo(陶枳樽)，據知，CrzTo亦係參加過選美出身，據知，Phil最近成日去銅鑼灣一間酒吧去玩，嗰度不時有唔少「竹升妹」夜蒲。

周刊於上個月23日，影到Phil同翻版「栢芝」CrzTo玩得好埋，風趣嘅Phil更主動氹對方開心，輕撫CrzTo嘅玉臂，據知情者向周刊指，Phil多數夜晚9點幾就同喺夜場打躉，傾得埋仲會同啲「竹升妹」又錫面又攬腰。

據知Phil當日滿場飛，掟完乒乓球又擲飛鏢，當Phil發現有周刊記者在場，佢即用眼神啤一啤對方，丟下CrzTo就走，Phil貴為夜場「Play」股東之一，玩夜場game一向好叻，其實未向CrzTo出冧招前，已向一個大露背「竹升妹」玩得好埋，二人不時咬耳仔，睇嚟Phil落場真係好快冧到女。

周刊都有問番CrzTo當晚係唔係畀Phil媾，CrzTo就話嗰日好多藝人都有落去，指Phil本身鬼仔性格、好熱情，佢哋之前已經識，係見面傾兩句，冇留意對方當時係唔係四圍媾女。

報道又指，手揸成4千萬物業嘅杏兒，一直視男方為結婚對象，Phil都知女友嘅心意，有傳男方早前同杏兒去馬爾代夫已趁機求婚，佢哋返港之後，男方仲搬去杏兒屋企。