韓國男團JYJ嘅32歲成員金在中早在東方神起時期已經常到日本發展，之後JYJ亦不時飛到日本開騷，即使現在佢亦經常飛到日本工作，早前亦喺日本推出新碟《Sign/Your Love》，並亮相日本節目。

金在中上親日本節目似乎比較樂於爆料，好似之前佢上節目《今夜比一比》時就公開自己喺首爾江南區嘅豪宅，日前上咗日本組合KinKi Kids主持嘅綜藝節目《KinKi Kidsのブンブブーン》亦唔介意爆自己嘅瘀事，佢自爆有一次到日本工作時，因為冇帶足夠底褲，所以只好手洗底牌嚟作更換，點知隔咗成日底褲都唔乾，金在中就靈機一動，決定將底褲放入微波爐「叮」乾。

金在中自言原本以為「叮」乾妙法一定唔會出事，仲調校咗5分鐘時間來烘乾，然後佢就走去沖涼，此舉有欠衛生之餘，最終仲搞到微波爐叮到出火。當金在中沖完靚涼後，佢就即刻聞到一陣燒焦味，原來微波爐已經起火，金在中見狀即拿拿臨拎水來整熄啲火，幸好最後冇發生火警意外。金在中大呻條底褲係粉絲送贈嘅貴重禮物，但最後燒到唔可以着返，金在中仲傷心話：「條底褲我好珍惜，着咗已經年半。」

粉絲得知金在中咁珍惜粉絲送贈嘅禮物時，即時二話不說就送上2千條底褲畀金在中，等佢唔使再煩唔夠底褲着，金在中近日收到咁大份厚禮後，噚日就將照片上載到twitter，仲留言話：「從各位身上收到底褲大概有2千條左右...之後20年都唔使擔心底褲問題。」最後又承諾粉絲唔會將底褲放入微波爐，話自己會好好反省咁話，不過最搞笑係金在中收到嘅底褲中竟然有白色喱士底褲，認真香艷。

更多韓流，喺晒《娛果》
http://fb.com/appledailyent