民主黨涂謹申星期一喺立法會審議私隱條例期間，見冇咩議員開會，手多多要求點人數。佢話希望多啲議員聽佢發言，邊估到當時唔夠在席人數，搞到流會收場，前後損失15至16個鐘嘅開會時間。阿涂自知玩大咗，噚日立法會復會再傾私隱條例，佢都好忍口，唔敢多次發言，聲言見過鬼怕黑，以後都唔敢再點人數咯。
運輸及房屋局局長鄭汝樺唔會過渡新政府，噚日最後一次現身立法會，最希望卸任前、即係呢一、兩日可以搞掂規管一手樓嘅立法工作；所以噚日一見阿涂就有「溫馨提示」，叫佢唔好再亂點人，否則就要由新一屆房屋局話事人張炳良接手處理呢個爛攤子。