鄭秀文（Sammi）噚晚喺中環出席名牌轉售網站酒會，佢話自己都唔介意用二手嘢，用緊嗰個手袋都係二手YSL，Sammi話：「自己唔介意用舊嘢，不過我好少上網買嘢，我買嘢鍾意摸到，又怕網上買嘢貨不對辦，o依家質素高之餘，仲好快送貨。」

Sammi指外國演員都接受着二手衫，佢話：「我自己都接受，只係怕香港觀眾需要新鮮感，其實偶然行地氈都可以着，自己遲啲都想試下，早排紅姑（鍾楚紅）搬屋，佢都俾咗十件八件舊爛殘嘅衫俾我，我唔介意，洗乾淨就得啦。」至於Sammi同鍾楚紅身形是否相似，Sammi話紅姑揀咗啲偏窄身嘅衫俾佢，Sammi話：「其實當係朋友之間交換禮物，我好怕麻煩，所以好少會攞啲衫去賣，今次攞咗五件出嚟捐俾機構做慈善，平時自己唔著嘅衫，通常都係俾身邊或者係屋企人。」

喺重要場合，老公許志安都會幫手揀衫，Sammi話：「大型場合佢會幫吓眼，俾意見，以男性嘅角度去睇，佢俾嘅意見通常都中，因為佢好了解我嘅身型，優點同缺點，當然最了解我嘅係我自己，邊度肥。」

劉德華將會喺年尾舉行演唱會，Sammi話如果可以自薦，梗係要報名：「唔知佢演唱會使唔使要我去做，如果需要可以隨時搵我攝位，就算我唔喺香港都要返嚟支持，華仔要特別優先。」Sammi又話拒絕所有親友代訂華仔演唱會飛，Sammi話:「一攞就唔掂，一攞就幾十張，我唔想煩到佢，親戚都係市民，用返普通市民公平嘅方法去做。」

周潤發曾經講過計劃喺離世後捐出身家，Sammi話發哥呢個方法好好，喺西方人好興嘅做法，佢話：「我暫時冇具體嘅想法，因為我仲後生，仲係工作mode，未諗分資產，因為我仲要做好自己，照顧父母先，再回饋社會。」

精選娛聞，喺晒《娛果》
http://fb.com/appledailyent