近年港姐質素掂唔掂真係有目共睹，難得嘅係「十優港姐」麥明詩終於有番啲睇頭，不過佢男友林作似乎唔係好識珍惜。林作早前被發現趁女友唔喺香港，竟然當街向低胸索女「A貨麥明詩」攞電話，雖然佢事後解釋只係朋友一場，不過麥明詩似乎唔係咁諗，嬲咗幾日都未原諒林作，要搵朋友吹水散心，問到佢同林作戀情時仲話：「順其自然啦。」咁嘅答法，心照！（相關新聞： http://bit.ly/28JnS7U ）

呢邊廂鬧分手，另一邊廂就係上位嘅好機會，「鴨王」何浩文（Dominic）就對麥明詩大獻殷勤，經常喺社交網站貼同麥明詩嘅食飯相，噚日佢貼完兩人合照上Instagram又再賣口乖關心對方留言：「嗰日邊個會估到有人貢精神，影完相笑完玩完，下一刻突然會哮喘發作，嚇到我咇咗兩粒尿，哈哈哈哈，小心身子啦以後。」

雖然Dominic最後冇tag到麥明詩，不過仍然有人睇唔過眼，留言狂鬧：「狗公出沒注意。」仲指責Dominic刪留言係「身有屎」，激到Dominic眼火爆，連打7條留言回應：「唔係話我X有問題，係你講嘅說話會影響倒女仔你明唔明，可唔可以用腦諗吓。」護花護到出晒面。

前途未卜嘅林作就盡力箍煲，噚日凌晨佢喺facebook貼咗張高登截圖，有位男巴打話林作個樣麻麻地，但知識淵博一出就嚇死人，不過最啱聽嘅，係講麥明詩另一句：「我覺得佢唔會睇唔起鴨王，但佢亦都唔會欣賞鴨王。」咁樣算唔算暗抽鴨王冇料到呢，之後佢仲講笑話叫呢位巴打聯絡佢，唔知係咪想分番五毛畀佢呢？

林作明張目膽咁引用高登source曲線撐自己，睇嚟件事唔會就咁算，想知後事如何咁就要留意埋下集喇！