薑，果然越老越辣！作風強硬嘅新任警務處處長鄧炳強，首個走訪嘅區議會落腳中西區，雖然PK鄧氣場勁，與會前夕已由警方喺回覆議員時指議案「誤導」，又就議員職務作訓示，但自1994年盤踞中西區衞城地頭嘅主席、民主黨鄭麗琼，不但冇被PK鄧大軍嚇親，仲喺席間挑機大戰警隊，結果一日爆紅，facebook嘅like數直線上升，中西區鄭麗琼同慈雲山鄭列瓊，一樣高人氣。

琼姐今日喺會議開始前已挑機警隊，先落個下馬威，叫在場便衣show委任證，否則唔該out，結果平時死都唔show委任證嘅便衣都要死死氣拎返張證出嚟先有得留低。鄧炳強出場進入會議室時，琼姐就以「PK鄧」介紹佢進場，冇錯㗎，炳強咪就係「PK」囉，幾親切吖。到質詢環節，琼姐依舊後勁凌厲，質問對方到底有幾多人被捕後喺警署被強姦、被送中、被自殺？敢言度令不少在席人士讚嘆。

琼姐嘅連番追擊行動，令市民喜出望外，據知佢嘅fb like數爆升，唔少網民留言話「主席好波」、「為民發聲」；連登甚至有個po，「鄭麗琼你選立法會啦，PK先生俾你撚到一棟都無」，一個po勝過千言萬語。由於表現太出色，亦惹嚟撐警藍絲攻擊，有網民質疑琼姐唔夠公正喎……哦。

其實今年60歲嘅琼姐，94年開始做中西區議員連任至今，做得長勝將軍，可見實力非凡，作為區內嘅資深議員，第一次做區會主席就表現出霸氣風範，唔知日後會唔會有更加多嘅招數挑戰政府，為民發聲呢？