吳千語沒有林峯嘅日子會做啲乜？原來係濕平，林峯呢排喺橫店開工，冇時間陪女朋友，但千語BB一啲都唔悶，佢日前先單拖現身銅鑼灣，綁住馬尾、着住白恤衫嘅千語BB，恤衫長到遮住條褲，佢咁着擺明要晒一對靚腳。

當時大約7點幾，千語BB拎住袋戰品喺利園一期等的士，佢趕住去灣仔東方188商場，佢好熟路直上一樓一間遊戲機店，估計係買慣買熟，店員見佢就立即拎出一部PS4，千語BB極速畀錢走人。當時係放工晚飯時間，商場開始多人，有啲男途人都認得千語BB，所以佢就戴番掛喺心口副墨鏡，佢買完嘢又約番剛才相熟的士司機嚟接佢。

千語BB先再去附近接咗女性友人，佢哋跟住第二站去咗西環一間米芝蓮都有介紹過嘅「書湘門第」，嘆重口味嘅湖南菜，因為未有位，兩女都要喺門口等位，期間千語BB狂揭門口嘅餐牌，睇定點乜嘢食，佢一心兩用，又玩電話，玩到放電話胸前甜笑，唔知邊個同佢短訊o氹到千語BB咁開心？有位入座，佢哋食咗一粒鐘左右就離開。　

千語BB離開餐廳，竟箭步入咗附近一間7仔，唔知係咪食物太重口味，佢趕住去買咗支冰凍飲品解渴，而同行女友人就慢慢揀咗大袋零食，跟住佢哋先一齊離開。