糖妹今日喺尖東出席「成功在望」分享活動，糖妹話即場同年輕人分享自己嘅入行經過，仲話最重要係有份堅持，佢話：「我唔敢話依家好成功，但出到街叫得出我個名。」

糖妹又話，發覺依家年輕人做嘢欠缺責任心，高層叫做嘢係咪都話唔得閒先？所以平時同粉絲傾偈，自己都會引導佢哋思想正面啲、做嘢積極啲，唔好「渣流攤」，問佢以前有冇試過「渣流攤」？糖妹話總有一、兩年係咁，之後好快入行就冇機會咁做，因為好多人催谷自己。

之前有周刊指糖妹同官恩娜想參加《中國好聲音》但遭拒一事，之前官恩娜已經話咗係「被參加」，根本冇呢回事，糖妹就話：「我同官恩娜都係『被參加』。」佢話自己係無綫人，明知對面台搞，咁一定唔會參加:「冇參加過now香港地區呢個，如果係中國地區，我會試下問公司係咪可以敲門遞紙參加，但之前亦冇敲過門。」

問佢會唔會預埋糖兄參加？糖妹話睇公司決定，可能兩樣參加晒，因為唱嗰個都係佢。至於係咪見G.E.M.之前參加《我是歌手》反應咁好，搞到都想參加？糖妹話：「佢（G.E.M.）好成功，但佢個節目同好聲音節目唔同。」

提到李克勤嘅新歌《北京北角》被指係維穩歌，問糖妹作歌會唔會小心啲？糖妹坦言：「我相信依家嘅敏感題材，我真係會避免，我自己未睇到件事點樣對香港人係最好嘅，所以唔會亂咁發聲，講到政治，有排都唔會知政治呢方面嘅嘢，專注好自己音樂先。」希望糖妹喺同大家分享時候，唔好同年輕人講呢啲咁嘅嘢啦。