老董同董太自從外遊後，兩人心情靚靚。一個就為本新書《香港禮賓府》月底面世而忙碌，一個就為新船「中華和平」號喺上海嘅命名禮而奔波。
香港大學美術博物館總監楊春棠同館長許日銓噚日向傳媒老友介紹本即將出版嘅新書，記載咗老董七年任期內禮賓府嘅變遷，以及期間舉行過嘅大小宴會。
其實董生同董太都冇入住過呢間前港督府，原因董太封嘴唔肯講，但係當八方問佢最唔捨得禮賓府乜嘢？佢竟然好感觸咁話，「係個廚房」。
原來董太做禮賓府女主人嘅時候，成日同廚房同事研究煲啲乜嘢老火湯可以帶出香港人嘅飲食文化，佢話有啲菜式啲達官貴人未必食過，唔一定要整魚翅、燕窩同鮑魚呢啲貴嘢，好似魚蛋粉同雲吞麵就好地道，當年宴請江主席就有魚蛋粉食。

學廚試過好食先上枱

董太打點宴會好細心，一餐可能有四五味風味不同嘅菜式，佢更同李國能、梁愛詩同曾太幾家人喺禮賓府學煮餸，連牛腩粉都學做，試過好食先上枱，真係服晒佢咯。講到保護文物，董太好肉緊話一定一定要保護，而佢亦好注重要搞好禮賓府內嘅女衞生間，唔使大家排大隊。
至於老董，由上海返港後就出席「健康快車」喺會展舉行嘅餐舞會，問佢對離任特首過冷河三年嘅睇法，佢就笑而不答，反而扯開話題話：「我有好消息呀，我台灣個妹夫隻船中華和平號今日（即噚日）喺上海下水禮呀。」老董個妹夫就係中國航運董事長彭隱剛，佢哋喺台灣嘅公司向大陸訂造船隻，算係首創。
噚晚晚宴唔見董太，原來佢同班老友去咗聽RobinGibb個唱，楊永強亦有蒲頭陪住A1，煲呔就嚟唔到。

傳真︰2623-9278
電郵︰[email protected]