當年今日
關於我們

  陳啟宗放記者飛機 - 李八方

蘋果日報 2002/01/22 00:00


電訊盈科母公司盈科拓展上個禮拜宣布人事變動,袁天凡唔再兼任董事,市場當然傳聞多多,八方昨日去到美國商會在萬豪酒店嘅午餐會,見到番薯袁,即刻問佢因乜解究,番薯袁一如既往,耍晒手擰晒頭,猛話只係希望專注於做電訊盈科同盈科保險的業務,叫八方唔好多心。
八方一向多心,袁天凡以往唔係咁專注,都收電盈董事酬金億億聲,專注之後唔知會唔會逆市加薪?
講開個午餐會,重有一個人八方好想見嘅,就係做Enron獨立董事做到俾美國投資者告嘅恒隆主席陳啟宗,呢單嘢唔知點收科。恒隆公關小姐同八方講,陳主席食完晏會出嚟同大家講幾句,重叫記者擺好晒咪,霸定好位,結果散晒席都見唔到陳主席,原來佢已經唔知由邊道門溜走,連同記者耍太極都嫌費事。
(圖)袁天凡話會專心做好電盈工作。


E-mail:[email protected]