【農夫入行18年】由中學同學識到依家 C君夠秤買鹹書賀陸永生日
演唱會農夫陸永鄭詩君
陸永(陸永權)同C君(鄭詩君),二人於2000年組成「農夫」加入樂壇,不經不覺已經18年,今年11月佢哋將會以「18歲生日快樂」為主題開6場演唱會。其實二人又豈只相識18年,佢哋同校唔同級,相識超過廿載,C君更大爆當年夠秤去買鹹書送畀陸永,而陸永抵死話自己冇朋友要同F.1仔嘅C君為伍,二人搞笑合拍度,應該冇其他人可代替。
早前農夫喺觀塘接受《蘋果》專訪,講到入行18年,但二人直言大眾認識佢哋,始於2007年同麥玲玲合作《風生水起》時,陸永話︰「做咗18年,仲有人以為我哋係新人,唔知我哋係唱歌出身,都唔出奇。」C君表示︰「完全冇諗過係有可能,我哋只係興趣小組,冇諗過用嚟搵食。」
今次農夫開演唱會,以「18歲生日快樂」為主題,C君搞笑話︰「我哋過到18年,大家見証住奇跡,演唱會始終係個騷,度咗個小驚喜,我哋生日送份禮物畀你哋,你哋夾錢嚟賀我哋,好合理吖。」
其實陸永同C君係中學師兄弟,兩人同讀鄧鏡波中學,只係陸永比C君高兩年級,雖然相差兩年,但點解會走埋一齊?陸永不失搞笑本色話︰「我可能冇friend,搞到要同中一嘅玩,幾醜。」至於二人是否校內嘅風頭躉或是校草?陸永即調高音量話︰「你問嚟奚落我哋,我都話有可能吖,你睇吓佢(指住C君)。」而C君亦不甘示弱,爆陸永中學時代瘀事,佢話︰「讀書時好恐怖,佢個頭髮前面有2條頭髮跌落嚟,好似曱甴鬚咁。」
談起當年踏入18歲,即刻想做嘅事,C君坦言話︰「我好記得我夠18歲,同你(指陸永)啲朋友一齊去旺角,買正版鹹濕漫畫送畀你(陸永一臉疑惑)生日,嗰時好巴閉,正版喎!我仲記得個老闆分析番,邊啲係粗線條,邊啲係重口味,講到係藝術咁。」陸永回應C君話︰「好彩你係揀輕口味同幼線條。」點知C君加多兩分力話︰「我哋夾錢買畀你,點解會買?因為佢鍾意睇。」此刻陸永只好說︰「咁送呢啲嘢,冇人會抗拒嘅。」
至於二人兄弟情超過廿年,有何說話想跟對方講,佢哋發揮搞笑本色,C君話︰「好高,志氣好高;好粗,佢份人粗中好幼細;有時又遠,佢有遠視。」陸永接住話︰「好短,短命呀!祝大家過到今年。」在笑聲中,二人邊吃住蛋糕邊搞笑地完成訪問。
精選娛聞,喺晒《娛果》
http://fb.com/appledailyent
兩女之父嘅陸永,依家收工趕返屋企湊女,仲話鍾意女多個仔,所以唔會再追仔。
陸永話自己冇朋友,要同細兩年嘅F1仔C君做friend。
農夫11月開演唱會,會開6場,以18歲生日快樂為主題。
2007年農夫同麥玲玲唱《風山水起》,唱到街知巷聞。(資料圖片)