古時有「路見不平，拔刀相助」，而家幫人唔需要用刀，出手就得喇。好似荃灣呢位阿Sir咁，專登停低鐵馬，幫執紙皮婆婆將架手推車由馬路推上行人路，目擊事件嘅駕駛人士都忍唔住畀個like呢位阿Sir，真係好有愛啊！

話說讀者Michael噚日上晝11點幾，揸車經過荃灣街市街，行行吓前方嘅交通警突然打燈停車，仲急急腳落咗車，但阿Sir唔係人有三急，亦唔係趕住抄牌，而係行咗埋馬路邊一位執紙皮嘅婆婆身邊，婆婆當時推住手推車，上面嘅紙皮堆得有啲凌亂，有啲仲跌咗出車，喺地面拖行，阿Sir二話不說，將婆婆架車托咗上行人路，但係都未有離開，正所謂幫人幫到底，阿Sir仲將架車推埋去垃圾站門口，知道自己架鐵馬頂住後面嘅車，阿Sir之後一邊同Michael舉手示意，一邊急急腳跑返轉頭開車離開。

雖然係小事一樁，但就令目擊過程嘅駕駛者like爆，阿Sir停低咗超過1分鐘，但後面嘅車都冇「呠」佢，非常耐心等候，Michael大讚「好人好事」，因為婆婆沿住馬路邊行，嚴格嚟講都冇阻住條路，佢估計係阿Sir擔心婆婆喺馬路行會有危險。

其實香港都有阿Sir同Madam樂意幫助市民，好似早幾日落大雨，北區大水浸咁，有私家車死火停咗喺粉錦公路中心，3位軍裝阿Sir冒住大雨踩入黃泥水，將架車推返埋路邊，雖然全身濕晒，但張相一放上網，就獲網民激讚「警察好勇」。而上個月，就有日裔香港柔道館館長喺銅鑼灣影到一位Madam，幫執紙皮婆婆推手推車。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568