早於70年代憑歌曲《偶然》走紅的玉女歌手陳秋霞，81年嫁到馬來西亞，跟金獅集團主席鍾廷森育有三女，做了少奶奶的她婚後退出娛樂圈，上月來港看譚詠麟和許冠傑演唱會，以一頭灰白短髮現身，原來去年中陳秋霞患了乳腺癌第二期，接受化療甩了大量頭髮，那是重新長回來的頭髮。

陳秋霞早前在當地出席新書《因緣．音緣》分享會，驚爆去年6月在港感到身體不適，還以為耳水不平衡發作，怎知檢查後發現患乳腺癌第二期，姨甥女鄺靄慧是養和醫院乳腺外科主任，即安排陳秋霞抗癌，她於四個月內接受八次化療及腫瘤切除手術，戰勝癌魔。

昨日身在吉隆坡的陳秋霞接受本報訪問，她在電話說：「好多謝大家對我關心，其實我病已經係舊年嘅事，隔咗咁多個月，我當自己好番晒啦，o依家仲食緊藥，呢隻藥一食要十年咁耐，唔緊要啦，當食補品，喺我患病期間，的確係有啲日子好難捱過，但我有家人同所信任嘅兩位醫生一直陪住我，有好多困難時間，我就將我嘅感受用筆寫低，所以有時失去一啲嘢，又賺咗一啲嘢返嚟，如果唔係有咁嘅經歷，我可能完成唔到我本書，我成日都咁諗，我賺到嘅係o依家短頭髮，起碼o依家唔使再為白頭髮而煩，我可以真真正正用好fashion嘅形象同大家見面，多謝你哋，我好好！」

早前陳秋霞接受當地傳媒訪問表示：「剛開始嗰關最難過，最緊要唔好壓抑，要適當抒發情緒。」回想接受長達五小時手術，陳秋霞笑言擔心皮膚會乾，在醫生同意下敷面膜入手術室，當自己去做facial。而接受化療時，頭髮甩得七七八八，有朋友提議她剃光，陳秋霞卻說：「你唔係我，唔會明白。當你擁有好多頭髮，可能唔會覺得點，但當你所剩無幾，就會明白至少還擁有嘅心情。」她很珍惜僅有的兩撮稀疏頭髮，更笑言可以梳丫環髻。

跟鍾鎮濤（阿B）當年是圈中的金童玉女，可惜最後分手收場，阿B對於舊愛患乳腺癌，他回覆本報表示：「聽到這個消息好唔開心，雖然最近少碰面，希望佢可以好快冇事，繼續玩音樂同寫書法，做佢喜歡嘅事情，祝福佢早日康復。」

而陳秋霞的姨甥歌手鄺祖德，亦是主診醫生鄺靄慧的弟弟，他大讚阿姨堅強：「佢心情一路都冇任何唔開心，反而好正面，身體冇乜副作用，只係甩頭髮，冇瘦過，胃口非常好，好似一個正常人，完全一點滴灰心都冇。唯一擔心fans見到佢唔開心，但佢好想話畀fans知：『我冇事！病唔使擔心，勇於對抗。』」