當年今日
關於我們

  扒王李玩盡「董見華」 - 李八方

蘋果日報 2003/06/24 08:00


連鎖飲食集團「扒王之王」董事總經理「扒王李」李德麟豈止對特首情有獨鍾,直頭係死心不息嗰隻。話說扒王之王今個月初搞噱頭,客人講聲「董建華」就有免費田螺食,點知引起特首辦不滿,扒王李息事寧人cut咗個優惠活動。

唔見一億照請客
一個月未夠,扒王李又搵特首個名玩,不過走精面,用嘅係「董見華」三個字,只要客人噏吓呢三個字,就有一百蚊現金券。特首民望咁低,八方硬係唔明點解扒王之王咁鍾意用佢個名宣傳,原來扒王李用心良苦。
扒王李話,其實佢都係想提升一吓董建華嘅民望,講一講佢個名,就唔使錢食飯,客人開心,點解唔好?佢話事前已經問咗特首辦,應該冇問題,而且政府攞錢出嚟請人食飯睇戲係用公帑,佢請食飯係用自己錢,冇人鬧得佢。特首辦對住八方就依然係嗰句,唔想董先生個名出現喺商業廣告當中。
不過扒王李搞笑背後重有一殼眼淚。佢覺得政府表現令人失望,回歸之後,樓價縮水,日日有人破產,營商環境惡劣過九七之前好多,佢自己嘅身家都冇咗近億,希望董建華班子快啲搞番好個經濟。
(圖)扒王之王董事總經理李德麟話今次問過特首辦,用「董見華」三個字宣傳並無問題。
王子俊攝


傳真︰2623-9278
電郵︰[email protected]