韓劇《雲畫的月光》24歲男星朴寶劍去年同36歲「童顏美女」張娜拉驚爆緋聞，當時朴寶劍方面已否認譜出姊弟戀，不過噚日兩人緋聞再被翻炒，韓媒報道二人近日被目擊齊齊現身首爾清潭洞一條「婚紗街」，傳出二人好事近，即將舉辦婚禮(相關新聞連結： http://bit.ly/2t5qMOq )。

噚日突然爆出「婚訊」， 朴寶劍同張娜拉方面都好合拍，即時否認婚訊：「絕對唔係事實，係毫無根據嘅傳言。」

未知是否今次傳言太誇張，張娜拉今日都忍唔住分別喺Instagram及微博開腔為傳聞解畫，佢下午就於Ig上載愛貓照片，之後就留言話認為談論冇理由解釋嘅事情係唔正確，不過佢強調二人冇見過，連偶遇都冇，自己亦唔知道條清潭洞「婚紗街」喺邊，話自己好多時間都係留喺屋企同埋屋企附近。同時張娜拉話無論佢年紀係乜，佢都係想成為一個好嘅演員，而佢於拍攝現場只希望成為好演員、好後輩、好前輩，不過唔知點解就成為令人感到有負擔嘅前輩。

張娜拉最後表示：「因為毫無來由毫無可能的事，任意討論我的年齡和外貌，為甚麼非要這樣呢？我只想順其自然地老去，健康地生活！我過得很好。」