繼續祥仔個棟篤笑騷，去到騷嘅中段，做表演嘉賓嘅陳志雲終於出場，仲扮已故嘅舊老闆邵逸夫爵士，喺以往香港小姐比賽中，慢慢行出台前個樣，至於着住黑色西裝，綑銀邊領嘅祥仔，就扮黎明同志雲大師chitchat(傾偈）。

志雲：你個4D騷非常成功喎，不過好多人問，睇嚟睇去，究竟有咩4D嘢睇，不如你簡單講吓4D係乜嘢囉？
祥仔：睇4D演唱會就好似撞鬼咁，要講緣份㗎，信則有，不信則冇，有啲人睇多啲啲，有啲人睇少啲啲囉，睇完ABC，一定見到D嘅！
志雲：你唔好講ABC呀，呢輪好敏感，因為AnyonebutCY。呢句話因為明明錯咗又唔認，而你處理所有事嘅公關技巧一流囉，你啲技巧喺邊度學㗎？等我哋嘅行政長官都學吓啦！
祥仔：公關講「我愛你」，你就一定開心嘅。我以前喺尖東夜總會拍嘢，見識到啲公關點樣嘅技巧囉！
志雲：如果時光倒流，你會揀邊個國家造嘅帳幕？
祥仔：邊個國家做都用，中國好、英國好，最好唔多國「覺」。因為有幕就有隔膜，握唔到手，因為握手驚有意外，影響後面啲人睇騷，我用個心嚟握手，你握到我，我握到你，不過呢啲都係講緣份。

此時，台下觀眾大笑又拍手，反應熱烈，志雲大師即刻食一句話：「如果CY嚟到真係唔會咁多掌聲！」之後志雲繼續問扮緊黎明嘅祥仔。

志雲：你會唔會好似王維基咁，認真考慮去參選立法會或者選特首？
祥仔：特首係一個稱呼，就算唔做特首，都可以特（凸）㗎！特首最出色就係左右手，但係右手會重要啲，因為左手就左（阻）手左（阻）腳。其實我依家得到好多財富，有啲人話我會發達，不過發達人都會雲歸天國，到時去邊度開騷好呢？
志雲：紅館囉！
祥仔：紅磡殯儀館呀！
志雲：呢輪你成日飲咖啡，消咗水腫。
祥仔：我係morecafe嘅細佬，lesscafe。