近年忙中港兩地走嘅黃一山，日前接受有線娛樂新聞父親節專題訪問，已經有兩個仔嘅佢話，自己只值70分，原因係工作太忙，冇時間陪屋企人。太太有冇投訴？佢笑話：「佢只係投訴要我賺多啲錢。」

原來佢博命搵錢，係因為患咗罕見疾病嘅大仔需要一大筆醫藥費，佢話：「大仔要坐輪椅，完全冇自理能力，需要我哋24小時照顧。」性格樂觀嘅一山，從來冇抱怨過，仲識得自我安慰：「其他父母可能要擔心子女學壞，但我完全唔使擔心囉！」

而為咗醫好大仔個病，黃一山訪尋過無數名醫，佢笑話：「連天眼通都試過，諗返起都覺得自己好好笑，點會有人有天眼通？周星馳咩！」

說到細仔，黃一山形容細仔高大威猛：「真係造物弄人，細仔雖然高大威猛，但就唔及大哥靚仔，所以冇乜女埋身！」黃一山好感情咁話：「大仔因為病，只可以經歷親情，所以我希望細仔可以經歷親情同愛情，擁有完整嘅人生。」