今日at 17就喺《蘋果》facebook同大家做live，答下網民嘅問題，同即場唱歌畀大家聽。一開始at 17就先唱咗首《始終一天》，之後同大家打招呼，首先有網民問：「買咗頭場23號嘅飛，點知你哋加場。」佢哋就話：「首先多謝大家，原本22、23號兩場騷，就同大家溫馨小聚，點知反應好熱烈，咁就加一場，咁因為25號係星期一聖誕節，所以就向前加一場，25號就正式發售，希望到時同大家喺伊館見。」

又有人問到時會唔會勁歌熱舞，佢哋就話：「我哋會勁歌...少舞嘅，我哋會熱烈咁少少熱舞，我哋係從來未試過喺演唱會跳舞，除咗喺達明嘅演唱會跳過少少。」今次嘅舞嘅係由林二汶排舞。二汶又透露今次會請嘉賓，不過就唔會係大家所諗嘅大星嘉賓，係想分享個舞台畀其他人，盧凱彤就話：「今次想請一啲我哋好欣賞嘅女仕們，同我哋共享舞台，因為我哋記得當年at17冇人識嘅時候，黃耀明就請我哋上佢嘅舞台唱歌，我喺台灣冇人識嘅時候，Eason都喺小巨蛋開騷嘅時候，都請咗我上去唱一首歌，令好多人識咗我哋，所以at17重組都想同人分享舞台。」

之後又有網民問佢哋兩個重聚之後最想做咩，佢哋就話：「最想一齊食啲貴嘢，因為大家單飛做嘢，唔會排時間食嘢，所以最想一齊食嘢。」二汶仲同大家分享咗少少減肥嘅心得，佢就話：「最緊要唔好食藥，要健康，做多啲運動，唔好唔食飯，乜都食，但唔好食咁多。」盧凱彤就話自己咩都食，但都唔肥。

除咗問問題，網民都有點歌要佢哋唱，佢哋就揀咗《The Best is Yet to Come》即場唱咗出嚟。

Eman Lam's credit:
Make up: micky choy@such a good...
Hair: Derrick Ng@M R K Duty

Ellen Loo's credit:
Make up: Vanessa Wong
Hair: Cyrus Sit @Salon Amarone

Wardrobes: Sport b.
場地：All-in Burger & Bar