今日係晨曦副會長周文曦爸爸周謙益97歲生日，陳山聰、馬德鐘、吳卓羲、苗僑偉、戚美珍、林韋辰、陶大宇、郭政鴻、彭健新、梁烈唯同衛志豪等噚晚眾星到賀，衛志豪喺IG貼出合照，留言祝周伯生日快樂，身壯如牛，再祝曦哥BoBo(崔嘉寶)結婚周年快樂，永遠甜過蜜糖。

原來噚日係周文曦同崔嘉寶結婚23周年，崔嘉寶1986年參選港姐，其後加入無綫劇組，崔嘉寶成為「銀河十星」之一，1995年拍完《情濃大地》便退出娛圈，因為明星足球隊成員而認識晨曦班主周文曦，二人婚後生咗2個囝囝。

而崔嘉寶老爺周謙益為人樂善好施，特別支持家鄉教育發展，周謙益於開平市出生，喜歡睇武俠書，培養出俠義心腸，1941年參加抗日戰爭，1947年取得中山大學學位，先後在香港、美國定居，近年熱衷慈善事業，周謙益曾喺大陸一個專訪中指自己教仔女，有「三不怕」，「不怕吃虧、不要怕髒、不怕辛苦」。

精選娛聞，喺晒《娛果》
http://fb.com/appledailyent