堡獅龍（592）內銷元素一路加重，息率又挨近5厘，有得諗。堡獅龍09年度（6月底止）純利倒退咗20%，到5025萬銀。但集團呢期撞正金融海嘯，有咁嘅成績，已經唔曳。又堡獅龍祖國收益4.7億銀，佔總收益20%。集團呢期進一步擴展內銷市場，喺祖國零售面積增加27%，到37萬平方呎。要咁睇，堡獅龍祖國收益比重唔係大，但食住阿爺谷內需政策，加埋集團本身擴展，祖國收益一放量，增長就會好爆炸。
堡獅龍2010年度純利係咁意升番3成，到6530萬銀，PE10倍水位。又集團本年度維持09年派息，息率都講緊4.8厘。堡獅龍現價0.435元博升3成，價見0.56元，到時，集團預期PE都係13倍。有內銷做後盾，呢個PE水位，仲係好吸引。

玖源平過同業一大截

玖源集團（827）NAV約莫0.14元，現價（0.176元）PB1.25倍。呢期扶農國策受惠股炒到開巷，同類化肥股平均PB都上到兩倍樓上，玖源係受惠一員，但PB就平咗一大截。又世界銀行集團嘅成員公司「國際金融公司」，揸咗玖源約莫9%權益，大孖沙份量唔係嘢少，對玖源另眼相看。呢轉短打，博玖源升穿1年高位，到0.22元，現價升幅25%，PB未有耐追到同類。

錢雋