每個星期一都係打工仔最痛苦日子，但美國加州有班人無論一至五都超享受返工，皆因佢哋工作環境有成21萬平方尺，有齊泳池、健身室、籃球場、沙灘排球場，仲未計日日有「胡迪」、「巴斯光年」（唔係鄧梓峰）迎接你返工．．．．．．全球得Pixar美國總部先有咁嘅待遇咋！

記者：黃芷蔚　攝影：廖達燊

教主親自設計TheSteveJobsBuilding

蘋果動主播Yvonne飛咗去加州愛莫利維爾(Emeryville)嘅彼思動畫總部參觀，離遠已經見到彼思標誌－巨型LuxoJr同Luxoball企定定喺度等候大家光臨(來自1986年動畫短片「LuxoJr.」)。為咗令員工有歸屬感，彼思以美國街名命名公司區域，例如「Brooklyn」、「WestVillage」、「Soho」等等。

至於工作核心「TheSteveJobsBuilding」，係喺創辦人喬布斯(SteveJobs)2011年過身後，為紀念佢對彼思嘅貢獻而命名。彼思員工笑言呢棟大樓係喬布斯親生仔，因為教主當年花盡心思去設計每個細節，大樓有左翼同右翼之分：左邊代表住人類左腦，主要係科技研發部門，右邊代表嘅右腦就係設計畫畫之類嘅藝術部門喇！本來兩邊係河水不犯井水㗎，之不過教主覺得員工要有多啲交流先有靈感，所以地下個又寬敞又多嘢食嘅飯堂就出現了！食物部分成本仲有公司資助添！

全球獨有PixarStudioStore

好多人都想知：到底點樣可以入到Pixar總部參觀呢？我哋就幫大家問咗，除咗等Pixar邀請你，有親友係Pixar員工就可以帶你入去㗎！不過呢個機會真係．．．．．．唔緊要，今次帶大家睇埋佢哋員工專屬紀念品店，裏面有總部先搵到，印有「PixarStudio」字樣嘅上衣同cap帽，不過現場所見就冇乜員工有着住返工嘞！

Pixar不乏香港員工

下集我哋會訪問有份參與《海底奇兵2》製作嘅動畫師Anthony同Maria，佢哋分別喺彼思做咗十二年同十年，話其實彼思隱藏唔少香港專才㗎！想知佢哋點樣入行同埋畫過咩動畫，仲會有《海底奇兵2》班底話你知邊個角色係史上最難畫！留意聽日同後日動新聞！