當年今日

隔牆有耳:科大生爭宿位靜坐 - 李八方

蘋果日報 2007/09/22 00:00


大學開課大半個月,不過科大就有些少麻煩未解決。話說科大今年由於超收非本地學生,加上校內宿位有限,令到超過1,100名學生冇宿舍住。有學生計劃喺聽日發起靜坐,迫令校方解決問題,預計會有100人撐場。
科大位於風景好到冇得彈嘅清水灣,但如果咁多學生冇得住喺學校,交通問題就非常頭痛。科大宿務權益關注組負責人Jimmy向八方話,好多住得偏遠嘅同學都分唔到宿舍,「除咗住喺屯門、元朗、北區嘅同學一定有宿舍住之外,大埔同將軍澳嘅人就冇得住。」冇宿舍住嘅同學,一係去其他同學房間屈蛇,一係就早啲起身,由屋企搭車返學。
據知,科大首席副校長錢大康已安排見學生商討,校方亦已向教院租借約68個宿位,亦考慮喺將軍澳區租私人樓做學生宿舍。