喺舊年10月開鑼嘅「張學友A CLASSIC TOUR」巡迴演唱會，今晚唱到去台灣，假台北小巨蛋舉行。

今日係元宵佳節，亦係學友嘅頭場演出，更加係佢成個巡迴騷嘅第50場演出。由於呢個騷係學友農曆新年後復工嘅首個工作，所以佢噚日都預備咗利是派畀工作人員，同時又收到唔少比佢年紀大嘅中嘅利是。

據台灣傳媒報道，學友今晚個騷獲好友庾澄慶（哈林）、張小燕等捧場，有人問快將再為人父嘅哈林有冇帶老婆張嘉欣嚟捧場，佢就笑答：「全家都來！」

至於前年封咪嘅台語歌后江蕙（二姊），就以「捨不得跟你吻別的江蕙」署名送上咪造型嘅汽球同花籃送畀學友，仲話：「無人能取代的歌神～我封麥，你說要把你的麥借給我…你留着啦，今晚用這支歌神麥克風帶我們去翱翔這趟經典之旅」。

學友演唱會喺當地時間7點半開場，率領舞蹈完演唱《我與你》，其後就唱出《非常夏日》等歌，佢同歌迷打招呼時，笑言：「大家應該覺得我唱很熟了吧？錯，我還是很緊張，我看台下燈牌已經看很多次，他們應該知道我錯在哪裏。」佢又話自己過咗「脫衣服的時間」（即係騷肌），但係兩年前起為開騷健身。

學友又祝觀眾元宵節快樂，以及預祝西方情人節快樂，仲安排大會反拍觀眾，並揀出最溫馨畫面嘅得主，獲得佢親身簽名嘅相，佢仲祝福對方永遠幸福：「記住今天，要是哪一天有甚麼意見不合或吵架，拿來看一下知道嗎？要記住這個時刻你是很愛她的。」