華華早幾日行經海運大廈，見到喺日本好出名嘅漢堡包店FreshnessBurger開咗間分店。華華對呢間店特別留意，除咗因為每次去日本都好鍾意食佢哋啲包，仲因為將呢間漢堡包店引入香港嘅人，正係遠東發展（035）主席邱德根個孫女、遠展副主席邱達昌嘅大女邱詠筠（Winnie）。
前排，華華同「老虎仔」邱達昌傾開，佢話畀華華知，喺大馬幫開公司手嘅大女Winnie，呢排返咗嚟香港，因為佢攞咗日本漢堡包FreshnessBurger嘅代理權，香港分店喺6月中已經開咗業，所以Winnie留喺香港打點。
之前，Winnie一直喺馬來西亞爹哋間公司MalaysiaLand，旗旗下PlazaDamas做董事，負責商場發展，做咗兩三年。原來26歲嘅Winnie好鍾意食FreshnessBurger嘅漢堡包，貪佢肉汁多兼夠健康，唔似美國漢堡包嘅牛肉咁亁身，所以決定將呢個品牌引入香港，佢仲特登同爹哋去試食㖭。

首月做150萬生意

講開邱德根，佢係當今世上經營亞視，至今唯一有錢賺嘅老闆，佢嘅商業頭腦唔使華華多講，估唔到嘅係商業頭腦都有遺傳，唔單止傳畀個仔，連孫女都好有商業眼光。Winnie知道好多香港人唔食牛肉，所以向日本總公司建議，喺香港店推出免治豬肉漢堡，同日本冇得賣嘅粟米湯。佢仲睇準近年喺香港勁吹嘅連鎖咖啡店風，所以除咗買嘅包巧心思，仲有自家肉桂奶茶同有機咖啡賣。
據講，香港嘅FreshnessBurger開業個多月，已經日賣過千個漢堡包，第一個月營業額已經達150萬銀。Winnie真有眼光。

衝住麥記嚟打

FreshnessBurger有乜咁特別，吸引到邱德根個孫女？
呢家東瀛漢堡包店係由日本飲食大師栗原幹雄喺1992年開嘅，賣點係天然新鮮、健康有益，後者簡直係對住麥記嘅要害嚟攻。
單係麵包都好講究，加咗南瓜蓉嚟焗，食起嚟有一陣清甜嘅南瓜香味。至於夾喺包裏面嘅料就更加唔講得笑，菜係本地新鮮手摘嘅；據講，手摘嘅菜比機摘嘅完整啲，養份冇咁易流失喎。
至於肉醬同蛋黃醬就係日本空運嚟嘅，確保同日本店嘅味道一樣。「主菜」、即係塊肉，只會用澳洲冇生長激素嘅牛肉，仲要即叫即製。
Winnie咁醒將呢家漢堡包店引入香港，好明顯都係一個識飲識食之人。
[email protected]