警隊「一哥」曾偉雄果然好「鷹」！呢幾日副總理李克強訪港，佢每日出動最少3,000警力嚴密佈防，滴水不漏刀槍不入萬無一失，成功將示威抗議人士全數阻擋攔截，完全入唔到領導人視線範圍，難怪警察總部噚日幾乎想開慶功宴，歡呼一哥今次超額完成任務，Yeah！

出動3,000人保護領導人，大家可能想像唔到有幾大陣仗，八方提供一個數字畀大家參考參考。噚日朝早有學生到港大想向李克強抗議，其中三人半路中途被攔截，現場警員連同保安員達20人，即係最少以六敵一，面對手無寸鐵嘅學生都咁兇狠，最「鷹」一哥果然唔係浪得虛名。
八方噚日問警隊老友，點解今次保安措施咁嚴密，眾所周知香港示威人士只係嗌口號拉橫額，最激行動都不過係推撞鐵馬，長毛更係有名「見好即收」十分錫身，警方反而晒馬幾千人，真誇張。老友係局中人，睇法另有一套。佢話今次副總理訪港只係「前菜」，明年回歸15周年慶祝大典先係「主菜」。
老友指明年新特首上場，中央最高級領導人極有可能齊齊南下出席慶回歸儀式，甚至外國政要都會應邀嚟香港見證盛事，今次保安措施成效，可視為明年部署前哨。聽老友言下之意，明年6、7月香港恐怕變成「警察城市」，老友呢個時候打官腔：「警隊會喺示威遊行同公眾秩序之間取得平衡。」

一哥今次護主有功，明年更加不容有失，若然佢繼續絕不手軟嚴打示威人士，更上一層樓絕對唔出奇，至於係咪下任保安局局長人選，八方冇意見，總之局長出身紀律部隊有例可援，只係唔係來自警隊，不過凡事總有第一次。
其實警察粗暴攔截示威學生，八方覺得只係表面工夫，一哥不如「鷹」到底，一不做二不休，將港大校園內太古橋標語「冷血屠城烈士英魂不朽　誓殲豺狼民主星火不滅」鏟除，跟手郁埋國殤之柱，咁就冇得頂嘞。

mailto:[email protected]