當年今日

股海實戰錄:電訊股反彈挾淡

蘋果日報 2002/01/15 00:00


港股噚日又出現反走勢,恒指喺一致睇淡嘅情況下,倒升42點收場,收11209。可能係多散戶造淡,大戶又先挾一轉淡倉,期指昨日高低波幅232點,唔少即市淡倉被迫投降。不過恒指反彈近50日線(現處11243)明顯有阻力,短期內抽唔番上去,港股難言轉穩。

慎防彈完再散過
中移動(941)跌至24元密集區終見支持,噚日反彈0.55元,收24.75元,睇嚟升勢主要同大戶挾期指淡倉有關,但技術方面則STC跌至超賣區,%K線回升,作勢要升穿%D線,有短期見底反彈迹象。不過若無其他利好消息支持或大市氣氛轉佳,似乎都係彈完再散過嘅格局。睇中移動等於睇埋聯通(762),兩者走勢十分相似。
近期大藍籌率先跌破50日線有中移動、聯通及滙豐(005),目前跌近50日線嘅大藍籌有長實(001)及和黃(013),只要昅實呢5隻股份走勢,大致可以捉摸到恒指去向。
趙飛雲暫時都係等位買貨,中海發展(1138)1.25至1.29元水平可收集,上實(363)月初急升後整固,但仍守10日線(現處15元)之上,14.20至14.60元可伺機吸納。