噚晚張敬軒紅館個唱頭場，有兩Pair備受注目，一pair係JW同男友Tarzan，另一pair就係阿嬌鍾欣潼同老公（定未婚夫？）賴弘國（Michael）。

日前（上周三）阿嬌同賴生十指緊扣由台灣返港，翌日賴生就要飛，好彩話咁快又飛番嚟阿嬌身邊。有「台灣醫界王陽明」嘅賴生，係整形聖手，佢前日仲應邀去深圳出席美容／整形座談會，開完會就落嚟香港慰妻，噚晚仲一齊睇張敬軒演唱會。

新婚嘅阿嬌，一臉幸福，仲多咗個幸福雙下巴。其實本來兩口子入場嗰陣係坐第一行，但後來疑是賴弘國人有三急，阿嬌陪佢去洗手間，跟住就冇再返埋原位，而係坐咗去老闆楊受成身邊。咁阿嬌作為旗下藝人，同老闆排排坐都好正常，於是佢左邊就坐咗橫賴弘國，右邊就係楊生，變咗個好趣怪嘅「嬲」字。

見阿嬌同楊生有傾有講咁開心，未知賴生會否懷念坐番第一行？