Naspers呢間傳媒大企業，透過整合成為南非最大收費電視營運商，98年進入中國市場，中國公司因虧損而喺2001年關閉收場，轉而投資騰訊，學精咗，唔派員進駐，成就今日嘅騰訊。

今時今日全球傳媒行業都撈得麻麻，而騰訊就喺如日方中嘅行業，形成強烈對比，所以即使Naspers靠食騰訊老本，但能夠揸貨到今時今日，持股價值過萬億先至肯減持，有咁嘅遠見，一路上似乎只得Naspers。

Naspers管理層願意花精力去分析騰訊，公司曾講過每次review完騰訊業務嘅結論，都決定繼續持有。作為大股東，除咗可以搵團隊專門研究呢個逾萬億投資之外，相信亦有能力藉住呢個身份，去了解騰訊不為外界知道嘅事情。

Naspers 07年直通車唔沽、08年海嘯唔沽、11年歐債唔沽、15年大時代都唔沽，而配售騰訊股份消息一出，Naspers股價仲跌得多過騰訊，投資者身體最誠實，反過來暗示想Naspers揸騰訊嘅股東勢力，比想佢沽嘅更大，睇嚟沽貨較大機會出於自身決定，左右佢哋沽貨嘅，睇怕係佢哋自己。

正當大家開始覺得股市前路睇得冇咁清之時，Naspers減持騰訊係不尋常消息，雖然唔代表股價頂已見，但相信投資者們，都不得不再審視一下手上騰訊持貨了。

晉佳

https://www.facebook.com/advanceguy1/