【韓流】唔止《與神同行2》受影響 吳達洙累三部電影陷重拍危機
與神同行2吳達洙
韓片《與神同行》嘅49歲男星吳達洙近日陷性醜聞,話劇女演員嚴智英上電視受訪時指控被吳達洙帶到汽車旅館,仲為女方脫衣服,噚日吳達洙為捲入性醜聞而發聲明道歉。
吳達洙爆出醜聞後,tvN新劇《我的大叔》即時飛走佢,由於吳達洙有份主演人氣韓片《與神同行2》,電影將於今個暑期上映,網民已揚言若唔刪走吳達洙將罷睇電影。不過吳達洙陷性醜聞影響到嘅作品《與神同行2》唔係最大,事關《與神同行2》吳達洙戲份唔係好重,但嚟緊有三部電影都係佢做主演,而三部電影都已經完成拍攝工作,無論刪除其戲份定重拍對片商都會係大損失。
三部電影包括由朴海日及鄭雄仁主演嘅《操控》、薛景求及千玗嬉主演嘅《我想看看父母的臉》,以及同鄭宇合作嘅《鄰家哥哥》,不過三部電影仍處於後期工作,亦未定檔幾時上映,故片商要好好研究點處理吳達洙嘅戲份。
事實上,喺韓國演藝圈藝人陷入醜聞時,無論劇集、電影、節目還是廣告都會第一時間與當事人劃清界線,以免受到拖累,估計吳達洙今次醜聞亦令片商好頭痕,而電影《鄰家哥哥》嘅相關人士就指電影雖然已於近期煞科,但仍需要慎重考慮及商討點處理吳達洙嘅戲份。
更多韓流,喺晒《娛果》
http://fb.com/appledailyent
吳達洙亦有份演出新片《我想看看父母的臉》,電影已經完成拍攝工作