2009年落選亞姐林紫君喺2013年因為拒絕上亞視強逼藝員上嘅洗腦式嘅「演藝訓練計劃」、上堂時曾忍唔住當眾爆粗戲弄導師問「XX懵懵食甜筒」嘅普通話講法（新聞連結： http://bit.ly/29ub5IH ），噚日有指佢已經完成27周警隊訓練，畢業時更奪得「銀笛獎」，佢喺講畢業感受嗰段段片中，提到「我加入警隊嘅原因，係因為我覺得每個人心目中都有團火喺度，都係存在一個正義嘅追求。警務工作唔係我第一份工作，咁因為我喺唔同類型嘅工作裡面發現到自己有不足嘅地方，就係學歷不足，所以之後修讀毅進文憑課程，完成咗就正式考警務人員，亦都係一take過。」（新聞連結： http://bit.ly/29vQHDW ）

本報今日就聯絡到林紫君本人，求證佢係咪由落選亞姐轉做陀槍師姐，當佢接到電話，得知記者身份同來意後，隨即生硬咁表示：「哦……Hi！我唔係好得閒呀o依家，唔好意思……」再問佢只係想confirm佢係咪已經做咗警察，林紫君就發揮「協助巿民」嘅精神，答：「哦，我諗我o依家都唔係幕前嘅身份，我唔需要解釋或者回答咁多問題係咪？唔該晒你先，byebye。」

另外，林紫君轉嘅可能唔止職業，疑轉性向，因為喺佢facebook度，見到佢同同性女子密照，其中一張喺巴黎鐵塔下，林紫君錫向該女子，被錫嗰位心情緊張有啲驚咁樣，而剪咗短髮林紫君喺今年5月1號更新過佢fb張封面照，係一名長髮大眼嘅女子從後擁抱，相中兩人都笑得好開心，林紫君嘅朋友仲讚佢哋係「兩個靚女」，唔知佢哋係咪閨密，感情特別好呢!?