【操盤手有私心?】騎師王封盤事件搞到一鑊泡!
騎師王操盤手阿Joe
上次(1日)日馬跑完頭場莫雷拉贏了「勇晉神駒」,馬會隨即宣佈「騎師王」封盤,理由係缺乏競爭,好似預示莫雷拉贏硬咁款。
賽後好多馬迷不滿,覺得馬會既然咁驚輸錢,不如索性取消咗「騎師王」,反正呢個彩池長期欠缺競爭兼唔值博。馬會呢次認真蝕章,唔只畀馬迷壞印象,外國莊家見到都應該偷笑。
馬迷覺得馬會小家唔輸得,原來最大問題出喺負責「騎師王」嘅馬會操盤手身上。據知馬會班操盤手係行佣金制度,上次頭場後急急腳封盤,緣於疑似班操盤手可能淨係計住自己條數,佢哋唔想繼續開盤蝕水影響分佣,話知你馬會形象有冇受影響。
其實平日「騎師王」彩池嘅投注額都係大約一千萬,呢次操盤手又封盤又開盤攪嚟攪去,結果令投注額縮到得番五百萬,暫停受注可能反而分少咗佣金,事後諗落仲呻笨老襯。
其實當日只要再壓低莫雷拉做騎師王嘅賠率,就算有人重注插落去,馬會輸盡都係小數目,唔使搞到家陣咁一鑊泡。
除咗「騎師王」,有玩足智彩嘅馬迷都知,馬會開嘅波盤對比其他外地合法莊家,賠率都係最低,難怪唔少人都鬧馬會食水深,講到尾又係操盤手作怪。
馬會其中一個社會責任係打擊非法外圍,引導賭仔幫襯合法嘅馬會,但係馬會一味顧住賺到盡,某程度上即係叫啲有渠道嘅人去幫襯非法外圍,鼓勵人去參與非法賭博。
今次封盤帶出唔少問題,值得馬會檢討,若馬會怕輸,就乾脆取消「騎師王」,若想繼續呢個彩池,係咪要改吓玩法,或者同馬迷解釋一下。馬會管理層亦要諗吓同操盤手嘅分佣合作形式,點樣確保操盤手專業公正,唔影響公眾馬迷利益。
==============================================================
【minigame】2017瘋暈人物 返工打機唔使擇日
http://bit.ly/2CeWQkP