【新增動新聞】
巴塞隆拿之前幾年有「MSN」呢個令人聞風喪膽嘅進攻組合，雖然隨住尼馬過檔巴黎聖日耳門（PSG）令呢個組合拆夥。不過，巴塞跟手喺多蒙特買入法國快馬奧士文尼迪比利，重新包裝之後又變咗個「LOL」組合出嚟。當然，迪比利家陣要受傷長唞，令巴塞暫時得返「LL」，但係球隊教練華維迪早就講明，喺近期嘅連串比賽肯定會輪換。結果係點？咪其實「LOL」都係多餘，因為一個「L」原來已經玩晒！

巴塞第二個「L」今場勉強做個無落場嘅後備，不過美斯一啲都唔介意，一條友就喺伊巴身上省入四粒。以為尼馬走咗之後，美斯會好掛住呢位巴西國家隊隊長？睇下最近嘅統計先喇！

美斯近五場賽事統計
日期　賽事　賽果　美斯統計
9月19日　西甲　6:1勝伊巴（主）　4入球
9月16日　西甲　2:1勝基達菲（客）　1助攻
9月12日　歐聯　3:0勝祖雲達斯（主）　2入球
9月9日　西甲　5:0勝愛斯賓奴（主）　3入球
8月26日　西甲　2:0勝艾拉維斯（客）　2入球