觀塘apm商場搞十．一特備節目，展出兩個已故領導人毛澤東同鄧小平蠟像，由於造型栩栩如生，連拎住支煙嘅神態都做到十足十，兩人好似翻生嚟咗香港咁。商場方面近日睇睇吓覺得有啲問題，唔係有乜邪嘢，而係老毛同老鄧手上香煙有啲礙眼，事關香港實施禁煙條例，商場一律禁煙，兩個蠟像公然拎住煙仔，唔係好夾喎。

事前徵詢創作人意見

為咗奉公守法，apm就將老毛、老鄧手上煙仔拎走，佢哋強調事先問過造像嘅西安超人雕塑研究院總經理鄒人倜，佢認為冇問題，商場先至「抽」煙，絕對無妨礙創作自由。兩個已故領導人煙癮大眾所周知，點知嚟到香港卻被迫「戒煙」，萬一泉下有知，隨時寫大字報炮打特區政府，橫掃一切控煙督察，控訴禁煙暴行，堅決維護一國兩制，還我吸煙權！
商場咁緊張，事關禁煙法例十分「惡」，早排電影《少女香奈兒》（CocoBeforeChanel）上映，原裝電影海報女主角手持香煙，點知有人向衞生署「查詢」咁樣有冇牴觸香煙不能賣廣告法例，結果電影公司自動將支煙仔刪去變咗支筆。海報係廣告，執正嚟做可以理解，蠟像係藝術品，有冇需要犧牲寫實性呢？

藝術創作多從寬處理

市民多數認為蠟像煙仔在手先有神髓，議員李華明認為蠟像只係重現毛澤東同埋鄧小平嘅行為，商場唔需要咁拘謹，主事人應該充份了解法例，唔好矯枉過正。另一議員鄭家富話，其實立法會就藝術創作應否豁免於禁煙條例呢個問題，開過幾次會激辯10幾個鐘頭，最終聽取藝術家意見從寬處理，免得扼殺創作自由。
佢話好似舞台劇咁，角色因應劇情需要可以喺室內吸煙，既然真人可以吞雲吐霧，點解毛澤東、鄧小平蠟像要「抽」煙？「好似鄧小平蠟像咁，冇咗支煙好似真係差啲嘢，因為佢真係煙不離手o架嘛。」鄭家富指室內禁煙目的之一係防止二手煙，蠟像拎住煙仔應該不違法，「蠟像唔會令人吸到二手煙，又唔係同某個產品賣廣告，應該冇乜問題啫。」

mailto:[email protected]