當年今日

馮仁昭四圍超:郭可盈、林文龍抱囡囡團年 - 馮仁昭

蘋果日報 2011/02/03 00:00


郭可盈近年都忙於喺內地拍劇集同做代言人拍廣告,工作非常忙碌,不過年近歲晚自然要返香港同老公林文龍及囡囡一齊過啦。前晚年廿九,佢哋一家三口去到灣仔有富豪飯堂之稱嘅福臨門晚膳,囡囡打扮仲好有新春氣息,粉紅色長襪加一件同色嘅羽絨背心,非常醒目。
兔年盼追仔
一家三口仲好合作笑晒口畀記者影相,郭可盈之前話過想替囡囡追個細佬,睇吓有冇機會今年追番個兔仔啦。其實可盈之前幫過一名患上晚期卵巢癌嘅內地fans小燕完成心願,喺聖誕節當日陪佢去咗香港迪士尼樂園玩,雖然呢位fans已經不在人世,令可盈傷心咗一段日子,不過見可盈收拾番心情,馮仁昭都戥佢開心。
另外,差唔多同一時間,個仔龐維仁榮升金牌大風話事人嘅龐老太,前晚都同一班朋友去到福臨門用餐。
當龐老太見到大班記者都有啲驚奇,但仍然表現慈祥。對於記者嘅提問,佢好有心機笑笑回應話:「唔係嚟團年,普通食飯啫。」
empty
龐老太(左一)見到記者雖然有啲奇怪,但仍然表現友善。