葛輝事件未收科，財爺鬍鬚曾噚日拉大隊到立法會接受議員質詢，雖然官府擺出理直氣壯姿態，絕對有信心輕易KO葛輝，不過心戰室唔怕一萬，至怕萬一，噚日都做咗好多工夫保護財爺。
為免傳媒密集式報道鬍鬚曾出席立法會會議情況，港府噚日同時宣佈派6,000蚊安排，喺下午舉行傳媒簡報會，介紹派錢方案內容，此舉顯然係想分散視線，事關如何登記攞錢、幾時派錢人人關心，傳媒剩低無幾多時間報道鬍鬚曾醜態。
另一方面，建制派議員亦好有默契，噚日做好準備「迎接」鬍鬚曾，務求速戰速決，冇機會令泛民拉布拖延，免得夜長夢多。果然噚日會議冇通過引用權力及特權法，解除鬍鬚曾燃眉之急，建制派日後再次勤王。