嚟緊下月24日至3月1日喺紅館舉行6場演唱會嘅鄭伊健，今晚喺《蘋果》娛樂facebook專頁《娛果》接受facebook live訪問，伊健一嚟就以佢經典角色「陳浩南」嘅口吻話：「點解要玩facebook live？巴閉囉！英雄主義，話時話唔好嬲，Like就得啦，o依家開始留言！」

伊健挑戰一連串高難度考驗，第一個遊戲係叫佢喺《古惑仔》系列電影作品中，正確認番啲「死過翻生」嘅角色。伊健一見到黎姿即刻講得出「細細粒」，但之後嘅「端木若如」就畀晒貼士都講唔出名，只係講到「教書嘅，喺台灣嚟。」

到好兄弟謝天華，伊健叫得出佢係「大天二」，至於另一角色就笑言係「小天二」，當主持人畀貼士係英文名時，伊健話：「Laughing？M字嘅？M字額，呢個真係唔記得，死啦，呢個我都唔識，今次我零分啦，弊傢伙。」對於外傳伊健同謝天華不和，伊健笑言：「係呀，佢o依家攞唔到我啲飛。」

之後到佢「大佬」吳志雄，伊健成功答中晒兩個角色名；但睇住另一兄弟朱永棠嘅兩個角色劇照，伊健除咗答得出「巢皮」，另一個佢就投晒降，仲向網民求救：「死啦！呢個真係唔識，有冇網民識？」當棄權後得知答案係「蕉皮」時，佢就一言驚醒。

當去到更高難度嘅梁焯滿同張耀揚，伊健完全唔記得梁焯滿原來做過兩次，仲自嘲「老人痴呆」；至於曾分飾三角嘅張耀揚，伊健好快答出其中兩個角色名「烏鴉」同「耀揚」，但第3個名一直都諗唔到，更向鏡頭後嘅《古惑仔》超級Fans同事求救，但最後都係棄權。伊健坦言今次遊戲係有史以來最難：「呢套戲完咗之後，我都係冇重複睇，我哋幾兄弟我就記得，洪興以外就唔記得。」

問到當年接演陳浩南一角，伊健有冇因為同自己形象唔夾而感到後悔？佢坦言唔想拍，但見到導演劉偉強好有誠意。伊健仲記得開工第一日就去到屯門、元朗一個揼骨場，佢話：「死啦！我哋拍緊乜嘢呢？咁真！我仲記得當日陳小春開住架跑車去拍戲，點知出面打交，整爛佢架車，哈哈！」佢坦言當日係有少少驚，仲諗過可唔可以唔拍？但之後大家熟咗，越嚟越有默契，好想做好件事，就扭轉晒成件事嘅睇法。

拍攝《古惑仔》系列電影，除咗浩南一角，伊健最想演五兄弟中邊一個角色？估唔到佢揀咗由黃秋生飾演嘅「大飛」，伊健話：「我覺得個角色好好玩，永遠喺緊要moment，佢一出現就搞掂成件事。」伊健又話自己都拍過啲奇怪角色，好似《三岔口》同《第一誡》中嘅角色，佢話好玩，因為可以多啲唔同選擇，但因為《古惑仔》係英雄主義、漫畫改編嘅戲會容易入腦啲，反派、另類啲角色大家會覺得係考演技，睇完可能覺得幾好，但唔會入心。

談到會否有演過嘅角色係唔想回望，甚至乎想燒咗部戲？伊健指又未至於要燒，但有一段時間自己係屬於英雄形象，佢話拍過一輪搞笑片：「《老婆唔夠秤》我接受到，之後拍《見習黑玫瑰》，我做羅賓，呢個角色原本接唔係咁，之後不斷改劇本，變咗呢個羅賓，我都係演員，要做好佢。做完之後有啲導演就覺得我咁都肯試，就繼續搵我拍戲。」

提到下月演唱會，伊健話已籌備得七七八八，佢話已經做到第5次，唔止觀眾，自己都有要求。至於觀眾最期待嘅握手位，佢話每次舞台設計師都將台邊同觀眾席保持一段距離，就算坐第一行都握唔到，反而山頂嘅觀眾可以睇到個場全貌。而嘉賓方面，今次應該冇。被問到表演跳舞難，定唱國語歌難？佢話：「跳舞難，國語歌直頭唔唱，可以嘗試，但基於rundown排歌序，有啲國語歌未必擺到入去，喺內地都係唱廣東歌，我諗人哋鍾意聽嘅係廣東歌，不如唱廣東歌。」

之後伊健玩用普通話講急口令遊戲，佢好快咁順利過關，伊健笑言平日掩飾得好：「我專登講得差，等人誤會。我有練，返內地做騷，有啲國語要講，開會都會用國語，以前就好少用，o依家都會抽時間學吓新嘢，譬如國語同人哋溝通，英文都試吓，日文除外。」

講到伊健愛打機，有唔少人都會用xx陳浩南或xx浩南哥等名稱，至於伊健會用甚麼名？伊健笑言：「唔講得，簡單英文名，E……。」佢話唔會打到課金，亦都冇咁多時間去打，佢係鍾意睇人點寫一個遊戲同畫功，佢話平時都會同老婆蒙嘉慧一齊打party類型遊戲，不過太太比較鍾意玩電話上簡單嘅遊戲為主。

精選娛聞，喺晒《娛果》
http://fb.com/appledailyent