由韓國影帝宋康昊夥拍劉海鎮及柳俊烈主演嘅《逆權司機》上月2號喺韓國上映，至今一直大受歡迎，電影上映19日已突破千萬人次，成為今年最快破千萬觀眾入場嘅電影，而電影將於本月21號喺香港公映。

而根據韓國振興委員會嘅數據，噚日《逆權司機》嘅單日入場人次高達57,004人，截至噚日嘅總累積入場人次以達11,673,838，更成功取代去年人氣韓片《屍殺列車》，成為歷年來最多人觀看嘅電影第11名。

據知如果因周末票房影響，《逆權司機》能夠保持呢個入場人次的話，外界一致認為《逆權司機》極有可能打破於2004年上映、由張東健及元斌主演嘅《太極旗飄揚：生死有情》嘅11,746,135累積入場人次，打入歷代票房嘅第10名。

另外，片商日前公開咗宋康昊、柳俊烈及湯瑪士基斯曼(Thomas Kretschmann)嘅合照，感謝觀眾嘅支持。