對唔少人嚟講，香港仔852係個陌生名字。不過如果你有行開PageOne，或大型嘅連鎖玩具店，可能經已見過佢哋嘅荔園系列模型，大門口嘅夢幻堡壘、會噴坑渠水嘅大象天奴、必玩嘅掟階磚贏香口膠、史上最細嘅摩天輪，以及回憶中永遠帶有尿臭嘅鬼屋（神秘寶洞），呢啲早就變成歷史嘅舊物，統統變成立體拼圖，重現大家眼前。

新的3D碼頭系列，同樣不脫紙紮模型本色，不會見到像日本模型般的精細分色拆件，甚至僅僅是最raw的凹凸入榫設計。不過砌模型時，我完全不用看說明書，因為實物早已深印腦海，自自然然逐件嵌上，十餘分鐘就能完成作品。新作當中，最吸引眼球的，相信會是卜公碼頭。香港仔852director歐陽永權（Andrew）都話：「對香港人嚟講，卜公碼頭嘅回憶特別深刻，或者係多任港督都喺嗰度上岸啩！加上呢個碼頭唔似其餘嗰兩個咁變成歷史上嘅微塵，因為喺九十年代，香港人嘅本土意識開始抬頭，香港政府又喺保育意識同其他因素驅使下，拆除之後，喺赤柱美利樓附近重新興建。」