𠵱家喺香港,做球迷嘅,只要肯畀錢裝兩個收費電視解碼器,真係日日都可以有波睇。好似前晚咁,一般周一晚上最多只有英超聯直播,當晚雖然無,但都有一場英格蘭聯賽盃直播。戲碼雖然只係阿克寧頓主場對諾定咸森林,但場波都幾多嘢值得我求大俠同大家講吓。
場波首先搵嚟其中一位最富娛樂性講波佬做中文旁述,我求大俠一聽到佢把「有今生無來世」嘅聲音,雖然半夜開波都即刻醒一醒神;佢講波之餘,亦同時講咗好多題外話,例如話森林位阿根廷籍守將係「三級球員」等等。
據呢位莊諧並重嘅講波佬所講,對賽兩軍平時嘅比賽,可能都無乜機會被揀做全球直播嘅關係,兩軍領隊着晒西裝執到靚一靚示人;場上球員波衫上亦印晒佢哋嘅名,分分鐘踢平時嘅低組別聯賽都無咁認真。