煲呔同黨派頭頭密會搞出講大話風波，呢次會面仲有手尾跟，由於煲呔喺禮賓府做選舉嘢，按規例佢要申報開支，將會面時用咗幾多錢如實交代，煲呔方面強調會按市值計算租金，咁即係幾多錢呢？煲呔競選辦冇人答到八方。
八方問過幾位地產界專家，有人話𠵱家中環甲級商廈每呎租金逾100蚊，最簡單計法係睇吓煲呔見客間房幾大，計算出月租再除開使用時間就得。
不過另一專家指禮賓府係法定古蹟，好難用一般商廈租值比較，「而且佢喺禮賓府住，中區住宅租金同商廈租金分別好大㗎，佢諗住點計先？」
以煲呔食得唔好嘥嘅有衣食作風，八方相信佢一定會用最克己價錢計算租值。
老董當年競選連任，都另外喺聖約翰大廈租間office會客同見記者，條數均真得多，邊有咁唔清唔楚㗎。