【新增內容】
韓國演藝圈近日掀起「#metoo」反性侵、性騷擾運動，當中韓劇 《Cross》52歲男星曹在顯被爆曾涉性侵、涉性騷擾劇組女工作人員及女新人演員，近日再有女記者爆料指訪問時曾被曹在顯性騷擾，警方早前已就事件展開調查。

曹在顯爆出性醜聞後一直未有露面，而且足不出戶，正於家中反省。而曹在顯開設嘅劇團Soohyunjae，於爆出性醜聞後一直停業，目前劇團辦公室只剩三名女職員。有劇團職員表示，目前佢哋於冇曹在顯嘅指示下，等待最後一部作品結束，之後結束業務，透露劇團即將關閉。

另外，一名80年代參選韓國小姐出身嘅女星A某，今日向韓媒爆料，表示36年前曾遭男演員B某性騷擾。A某透露跟B某於一次拍攝中相遇，拍攝後B某邀請女方去汝矣島一間酒店見面，A某去到酒店大堂後被帶上房間，A某其後趁機逃走。A某表示雖然事情已經過咗去好多年，不過因為近日嘅「#metoo」運動，加上佢嘅女兒鼓勵，令佢終於開口公開當年嘅事。

隨後韓國節目《News7》播出跟A某嘅訪問，透露B某係68歲男星李瑩河，A某又於節目中公開跟李瑩河嘅短訊內容。目前，節目組未能聯絡到身處海外嘅李瑩河，不過捲入性醜聞後，李瑩河今日下午突然刪除Facebook嘅留言及照片。

更多韓流，喺晒《娛果》
http://fb.com/appledailyent