人保（1339）喺咁多間內險股當中，預測PE、PB，係至平選擇之一，NAV增值爆炸力亦名列前茅，上周港股大插，人保跌到近半年起步位，現價仍然殘到痹，要煲人保。
人保上周三（8號）最低見3.61元，去番半年起步位，之後反彈，現價（4.31元）仍然比5月26日高位，累跌咗26%，係跌得至殘嘅內險股。
場內最新專業評估，人保今明兩年EPS為0.46（港元．下同）同0.49元，兩年預測PE為10.8倍同10倍。行家今明兩年平均PE為14.6倍同13倍，人保PE平咗大截。
同樣專業評估，人保現價預估2017年PB得0.98倍，新華保險（1336）同期預估PB係講緊1.2倍，場內行家平均PB更講緊1.4倍。人保PB平絕全場，比行家平均值係折讓咗30%！
人保後年嘅PB，可以調降到咁吸引水位，皆因集團NAV，由去年底2.73元，一支箭增加40%，到2017年時3.83元，係繼新華保險之後，最有爆炸力嘅內險股。
難怪上周中港橫風橫雨之後，中央結算紀錄中，北水透過滬港通揸人保H股權益，仍然達到最新1.66%或1.45億股。