噚晚澳門真心熱鬧，有黎明（Leon）喺新濠影匯開騷，開騷前又同fans坐8字形摩天輪（新聞連結： http://bit.ly/2a92RmP ），另一邊廂，原來喺威尼斯人都有騷開，主角係當年（1986年）同Leon同屆參加新秀，贏咗Leon捧走銀獎嘅許志安。

安仔噚晚個《許志安COMEON:PARTTWO演唱會2016》澳門站，搵咗車婉婉做嘉賓，仲同安仔合唱咗兩首歌。之後車婉婉就送咗個生日蛋糕畀安仔，話要預祝對方下個月12號嘅生日，安仔喺台上狂笑，仲話：「做咗40幾年人，都未試過要預早成個3禮拜慶祝！」

安仔嘅個唱中途發生小插曲，耳機出事，一度要停唱，等工作人員換番畀佢先再唱。安仔完騷後受訪時話：「其實都好彩耳機雖然出咗問題，但觀眾都冇投訴，因為佢唔知台下有冇聲，不過其實呢啲台上意外成日都有o架啦，以前試過咪冇聲。講緊最初嘅時候喺酒廊唱歌呢，仲試過有蛇添！」佢話當年可能係有黑社會搞事先有蛇。安仔仲講到今次巡迴尾二站，唱埋馬來西亞就完工，之後就會全心全意做唱片，預計11、12月就會出，呢排亦開始派新歌。

另外，講到Leon同一晚又係喺澳門開騷，安仔話：「係呀我知呀，佢係咪開兩日？（記者：係呀）大家都加油啦，睇吓聽晚有冇時間去睇啦！希望可以有機會食到餐飯囉，食到葡國嘢就好喇！」

咁唔知安仔會唔會着番嗰件T恤，再同黎天王影番張合照咁呢？