高陽科技（818）兩個月前以溢價逾5%，每股1.50元配售1億股畀包括嘉里（683）董事長郭鶴年同埋OZManagement旗下3個基金，但係配售完成足足2個月股價都冇反應，橫行咁耐，到噚日至叫有反應，升咗16%，報1.82元。
呢間前身係粵海建業嘅公司，由現任大股東渠氏入主後搞資訊科技，包括在國內搞自動櫃員機。高陽表示已經與交通銀行（3328）協議在未來5年內發展1萬部櫃員機網絡，並且會從櫃員機的跨行交易中與交行分賬，每宗收取數元費用。咪睇少呢幾蚊，假如日後國內自動櫃員機普及到好似香港咁，條數好㩒計。
目前該公司已經替交行在北京、天津及廣州等地發展200部櫃員機，料明年會加速發展，除交行外，預計未來有機會多接2至3宗大型銀行合約，將來涉足範圍可推廣至保險及證券公司。呢隻股有另類國內金融業概念，可以趁回吐買少少，跌穿1.65元止蝕。
光大國際（257）早市中段突然急升十幾格，之後成個下晝股價只能橫行。公司上個月宣布斥資4億銀收購兩個濟南污水處理廠項目，據特許經營協議，光國擁有獨家營運污水處理廠權利，為期30年。
現時內地污水處理率僅約45%，即係逾半嘅污水未經處理便直接排出，對環境造成嚴重破壞，也污染食水來源。國內目前近300個城市，根本沒有污水處理設施，因此近年唔少公司轉型搞水務，噚日光國股價異動，莫非又有新項目？
歐陽風